Food Crisis (gapu iti iyaadu ti tao?)

“UNTIL now it’s impossible that the population is behind the country’s food crisis. The real culprit is the continuing and rampant corruption in government,’ malagip unay ‘toy numo ti biang daytoy nga insao idi ni Arsobispo Oscar V. Cruz idi, kakabsat.

Kadagiti tartaraudi a resulta ti naiwayat a population survey, maalarma ti gobierno! Adu ket umad-adu iti mamin-adu a daras ti idadakkel ti bilang ti population ti Filipinas!

Saan a supringen ti Simbaan dayta a nadaras nga iyaadu ti tao.Anamongan ketdi ti Simbaan ti natural family planning. ‘Tay kabaelan dagiti nagannak a patanoren a nadesente ken nasayaat ti annak.

No apay a maalarma unay ti gobierno ti iyaadu ti tao? Maysa ditan ti saan met laengen a marisrisut nga idadakkel latta ti unemployment rate! Wen, adu ti jobless latta nga umili! Ket, daytoy ti agbalin a buong ti ulo ti gobierno wenno dagiti maseknan nga umili, a. Nagadu ti paggastosan ken nanginngina ti gatgatangentayo a daily commodities! Sumangkamaysa pay a babantot ti kaadda itan ti E-VAT – Expanded Value Added Tax! Sapay koma ta ammo dagiti kakailian a liklikan nga ibutos dagiti kandidato nga author dayta a diaske nga E-VAT! Siempre, makapadagsen iti bolsa dayta a nainayon manen a buis! BUIS-it! Uray koma, a, no di ibolsa dagiti birurukong dagita a buis! Takawen met dagiti kurakot nga agtuturay!

No ut-tobentayo ‘diay inibbatan a kapanunotan ni Apo Cruz, pudno unay, a, ket, wen, dumagdagsen latta ti cross nga ibakbaklaytayo iti inaldaw!

No adda proyekto, narasi. Nagdadakkel ti nailatang a pundona.Ngem, ania idi ti kuna ti pagtamdantayo a politico?“YUKYUKUYOK, INTON DUMANON, TAPOK,” maipanggep daytoy ti nailatang a pundo ti proyekto a magisaygisay babaen ti SOP – Standard Operating Procedure a pagbibingayan dagiti buaya ti gobierno (kurakot nga agtruturay). Pagangayanna, bassit laengen ti mabati a pundo ti proyekto! Malaksid a sub-standard ti proyekto, narasi a kapilitan.Ania itan ti iyawag iti dayta a proyekto?GHOST PROJECT!

“Crisis of management,’ daytoy pay ti kuna idi ni Apo Cruz. Wen, ag-focus koma ti gobierno a mangurnos ken mangpasayaat ti panagserbina ngamin kadagiti umili.Ti nasayaat, isu koma ti pannakaurnosna ken pannakaipatungpalna iti pulido a population control dagiti buklis a tattao iti bennegda. Adu met ti kuarta a rumbeng a maitulong kadagiti umili nangruna dagiti pada a napapanglaw. Ti ngamin kas-angna unay, segun dagiti lumlumtaw a kuntrobersia dagiti politicotayo, ad-adu met ti takawen dagiti agtuturay, puera de los buenos, ngem, ti dumanon a maiserbi kadagiti umili.

Isu nga ita a mapasangasangan ti panagpipili, ditayo koma agimbubulsek, kakabsat. Panawenna metten tapno patapuakentayo iti poder dagiti managkunniber nga agtuturaytayo. Padasentayo metten ti agkaykaysa a mangisaad iti turay dagiti politicotayo a patientayo a lesser evil. Ti koma masakbayan dagiti annaktayo ti isaganaantayo.Saantayo laeng nga agbiag gapu iti agdama; agbiagtayo pay iti masanguanan, iti narimrimat a biag-masakbayan.Saantayo itan nga ipalubos nga iturayandatayonto manen dagiti buklis iti kaban ti gobiernotayo.

Ita nga isursuratko daytoy a salaysay, saan pay a nagmawmaw iti panunotko ti iwarwaragawag dagiti politico – ngimmato kanon ti IRA share! Saan a daytoy ti mangipakita iti panagdur-as, kuna man dagiti nakasarsarita ‘toy numo ti biang. Kadawyan a ngumato dayta nga IRA share iti tunggal tawen. Ti nasken, ti pagbiagan dagiti umili. Tapno mapasayaatda met ti panagbiagda a saan nga agnanayon nga agsangsanggir ti ania man a pagimbagan a maipaay ti gobierno.

PAGPAMPANUNOTAN: The goal of yesterday will be the starting point of tomorrow. – CARLYLE.