KASANO METTEN DAGITI MULATAYO?

SAAN met ngatan a karkarna kadatayo, kakabsat, iti lagip wenno kadawyan a pannakipagpaspaset iti tinawen nga Arbor Day ditoy pagiliantayo, kakabsat. Babaen daytoy iti Proclamation no. 237, s. 1988. Iti pagilian a Filipinas, ramrambakan ti Environment Month iti sibubukel a bulan ti Junio a mangkallawit iti imatang ti publico a mangsalaknib ken mangispal ti rekursos naturales ti pagilian.

Ti Arbor Day, naparnuay babaen iti Presidential Proclamation 643 series of 2004, tapno agtignay ti individual, grupo dagiti mangisaksakit iti aglawlaw. Daytoy a pasamak, namunganay idiay Nebraska City, Nebraska, United States ken dadduma pay a pagilian ti lubong.

Iti local a gobierno, nangruna kadagiti barangay nga adda iti away (village), dagitoy ti pakasarakan kadagiti nalalawa a daga. Adu kadagitoy ti bakante a lote, uray ti private land. Nasayaat no ikalikagum a mulaan ti akinkukua ti bakante a daga ken kasta met kadagiti agay-aywan iti daga. Ita, mapasungadan ti kalgaw (summer). Kasano ti panangsaluadtayo dagiti naimulatayo idi sakbay, kaaldawan ken kalpasan ti Arbor Day? Siempre, kasapulan dagiti immulatayo ti dam-eg wenno sadurno a sibogna tapno saan a matay dagitoy gapu iti sagrapendanto a tikag.

Malagipko, idiay pagilian a Japan, nakangatngato ti real property tax a pakairamanan ti daga. Ti ar-aramiden dagiti Japon, ikalikagumda a sukayen ken mulaan dagiti bakante a dagada. Tapno iti kasta, agbalin dagitoy a productive a pangsubbot iti nangato a buis nangruna iti amiliar ti daga.

Ditoy Kailokuan a dalan ti naruay a layus no agbagbagyo, pakairanudan dagiti maseknan a lumugar no adu ti mapatanorda a kayo iti aglawlawda. Nangruna dagiti mabalin nga aramaten a pagtarikayo iti pagtaengan. Adu ita dagiti mabalin nga imula a patubo/nagtubo a kayo. Nasayaat unay no maimula dagitoy tapno adda mauray a pakairanudan iti masakbayan.

Dagiti pada nga agtutubo, nalag-an met kadakuada a trabaho no kadagiti tree planting activities iti masakopanda a barangay. Dagitoy pada nga agtutubo ti kangrunaanto a makipagtawid kadagiti tumanor a muyong iti aglawlaw.

Dagitoy pada nga agtutubo ti pakaipaagsepan ti kinapateg ti nasalun-at nga aglawlaw. Nasken ngarud a maimula iti panunotda ti kinapateg ken akem dagiti naruay a muyong iti aglawlawda.

Adda pagsasao a no place like home. No kasta man, paset koma ngarud dayta a kinapudno iti panangdungdungngoda iti aglawlawda. Ipangrunada ngarud ti agaramid ti pagsayaatan ti lugar dagitoy pada nga agtutubo.

Masuot ti kinasirib ti maysa nga ubing. Nagsaludsod ti lolo iti masirib nga ubing a lalaki: “Apok, pugtuam man no sibibiag ‘toy iggemko a tumatayab wenno natayen?”

Di nagpangngadua ti ubing a simmungbat iti saludsod ti lolo daytoy, kalpasan iti apagapaman a panagpanunotna iti kasayaatan nga isungbatna.

“Lolo, no ibagak a sibibiag, pis-item. No ibagak a natayen, dimo pispis-iten.”

Napnek ti lolo ti sungbat ti apokona. Nagbuliganda ti nagitukit ti patubo a kayo iti bakante a daga ti familiada. Nagsao ti lolo, kalpasan ti panagmulada: “Apok, adda kadagiti dakulapmo ti biag ken masakbayan dagiti patubo a kayo nga inmulata…” immisem ken nagtung-ed ti masirib nga ubing.#