URAY ‘toy numo ti biang, diak ammo no nakakitkitaakon wenno saan. Wenno uray adda nakitakon a ladawanna, diak ammo a Bandera Espanola gayam. Inggagarak nga isurat daytoy ta bareng adda makaam-ammo kadagiti dear readers no ania daytoy Bandera Espanola, no sadino pay ti pakasarakan kadagitoy?
Ania ngamin daytoy Bandera Espanola? Maysa a klase dagiti mula a Canna. Adu ti nadumaduma a marisda ken kaaduanna ti natangken ken nalabbaga (red). Manipud kiaw (yellow), naranghita, de rosas ken maris-ube. Masarakan daytoy a mula kadagiti tropical a pagilian wenno nabara a paset ti lubong a kas iti Filipinas ken uray pay kadagiti nalamiis a lugar a kas iti United Kingdom, USA ken China. Addaan iti 400 a varieties ti Canna wenno Bandera Espanola, ngem nagtaud dagitoy iti pito (7) nga species. Addaan met daytoy iti tallo (3) a nangingina a hybreeds. Kas koma ti C. flaccida, glauca indica iridiflora, jaegeriana, liliiflora, neglecta ken paniculata.
Addaan met ti rhizomes dagiti Canna wenno Bandera Espanola wenno ramut nga addaan iti carbohydrates. Idi un-unana a panawen, maar-aramaten daytoy a kas taraon ti tao. Ngem, saanen iti agdama. Apayen? Isu koma pay a pangpumpunno ti aginaldaw a taraon ti tao!
Awan met ti natakuatan a makapadakes iti salun-at ti tao ti ramen daytoy nga adda iti uneg ti bagasna.
Saan a kapkapten ti sakit daytoy Canna wenno Bandera Espanola, ngem, agnaed ken kanen dagiti birurukong. Awan ti sabali nga insekto wenno peste nga agkaan ti bulong. Iti sabongna, pagnaedan dagiti tumatayab a dagitoy ti agsisip ti nectar a mabalin a maiyakar iti sabali pay a sabong.
Kuna dagiti agpalpaliiw, napintas a taripatuen ti Canna wenno Bandera Espanola aglalo no adda ti pasetna a sibabasa. Ta ad-adda a makaipaay iti makaabbukay a buya ti kinalangto daytoy gapu iti kinaadu a variety ken klasena. Idiay London Botanic Gardens ti nadakamat a jardin a namulaan iti naruay a Canna wenno Bandera Espanola a naurnong a naggapu pay iti nadumaduma a paset ti lubong. No asideg la koma daytoy a lugar, ikagumaan ti mapan mangkita.
Sapay koma ta adda iti asidegtayo met laeng daytoy a mula. No adda pay, makuna nga extinct met ngaruden. Nasken a saluadan. Aglalo ta mabalin met gayam a taraon ti tao. Babaen ti agtultuloy a panagdur-as ti siensia ken teklonohia, amangan no ad-adunto pay a pagsayaatan ti maala iti daytoy a mula a maaw-awagan iti Canna wenno Bandera Espanola, kakabsat!#
