Mabalinmo a padur-asen ti panagbiagmo no sayaatem ti panagpampanunotmo.Napintas daytoy a pagsasao.Maiyataday nga amirisen dagiti kakabsat a tarigagayna unay a dumur-as ti panagbiagna.Aglalo kadagitoiy a panawen a marikna unay ti kinarigat ti panagbiag.Nangato ti gatad dagiti tagilako. Saan met nga umnadu ti mateggedan iti inaldaw. Awan pay ti agtalinaed a panggedan.
Ammo ti kangrunaan nga aramiden tapno maleplepan iti panaggasto iti nabuslon: BELT TIGHTENING a kunada. Wen, nasayaat no ammuen dagiti kangrunaan a kasapulan. No ania dagiti kaskenan a gatangen, isu laeng ti ipangruna nga ilatangan. Masapul a ni kabsat, ammona ti napatpateg a tagikuaenna: WANTS wenno NEEDS?
Ti WANTS ngamin, isu dagitay alikamen a di met pamastrekan ngem, ketdi, nalabit, isu pay daytay pagpalabasan ti oras. Gumatangka kadagitay home appliances: television, refrigerator, electric fan, etc. Nupay mabembennat ti kuarta, dagitoy met ti ipangruna – paggastosan amin dagitoy. Nupay adu met ti ipaayna a pagnam-ayan.
NEEDS, kangrunaan a kasapulan: taraon, agas, kdpy. No agkamtud ti taraon, nalabit, saan a nasayaat ti panagtrabaho. No saan, mangitunda iti panagsakit. No agsakitka, dika makapagtrabaho. Gumatangka ti agas.Aggastoska, awan pay ti mateggedam bayat ti panagsakitmo.
Disiplina iti bukod a bagi ti rumbeng nga aramiden.Dika matay nga agteppel nga agaliwaksay babaen ti panaggatang kadagiti bambanag a di pagsayaatan ti bituka a kunada.
Masapul nga adda latta umdas a taraon. Uray KBL – Kamatis, Bugguong, Lasona ti sida. Uray ugsa (uggot ti saluyot) ti sida. Ta makapasalun-at ti naimas a bulong ti saluyot. Paggaayat a sida ni Cleopatra a kunada man.
Panawen ti innartapan, kunam? No dimo maipakita dagiti kukuam iti sabali, makuna a napanglawka. Ket, dimo kayat ti maawagan ti napanglaw lattan. Ta kaipapananna ngamin ti nakapimpiman. Ipakitam nga adda kukuam/alikamenmo tapno madlawda nga adda inalatmo.Kasta ngamin ti adda iti ulo ti dadduma.Isu nga aggatangda ti home appliances.Uray installment.Daytoy ti adatna ngamin. Iyutang ti di pay nateggedan. Narigat ti kasta.Uray adda panggedan.Kasanon no gulpe a naikkatka iti trabaho?
Dimo itantan ti trabahom. No ania ti sumaruno a kuditen, masapul nga ITAN nga aramiden. Narigat no iyuray pay laeng iti sumnaruno a bigat. Ngamin, ti oras, nakuerdasan.Masapul a danggayam ti aglabas nga oras. Ti maaramidmo ita, sabalinto manen iti sumaruno a bigat.
Wen, narigat ti tungtungkua a trabaho a kunada. No agangay, maleblebgan, pagammuan, di malagipen.
PAGPAMPANUNOTAN: Sa pag-unlad ng bayan, disiplina ang kailangan.
