Adda daytay ditayo pulos ipagarup a sumangbay ti biagtayo iti panagbabawi, kalpasan a naisagmak wenno naidagel ken nailuodtayon. Kas koma ti panagsigarilio nga ag-agalen ti kaaduan, kalpasan iti panangdagdagupda ti magasgastosda gapu iti paypayubyobenda a sigarilioda. Kuna dagiti makasarsarita ‘toy numo ti biang, a kasla sumalun-atda no sumusopda ti sigarilio. Kurang ti aldawda no dida agpayubyob ti sigarilio. A kasla ketdin paset ti lasagda dayta a sigarilio a kayat a liklikan ti dadduma a nailuoden iti panagsigarilio, kakabsat.
Isardengen ti agsigarilio! Kasta ti kayat ti dadduma. Ngem, kasla makasabidong dayta nga addangda (isardengdan ti agsigarilio)! Banagna, ultimo remedio latta! Uray igatang ti taraon, adda latta met apag ti igatang ti sigarilio!
Makailuod. Makailunod ti panagsigarilio. Kasla anniniwan daytoy a sursuroten ti tao a mangiyaw-awan kadagiti mannigarilio.
Adda nabasak idi a sarsarita ni Aesop, maipapan iti maysa a babai a nalaing a makilumba (kasla Lydea de Vega ngata, a?). Abakenna amin a kalumbana. Maysa a lalaki ti nangkarit kenkuana tapno aglumbada.
Paggaayat unay ni Atalanta ti mansanas a sinan-balitok. Dayta ti gapuna a tunggal makita ti lalaki nga umun-unan ni Atalanta, ibatona ti mansanas a sinan-balitok. Mapan alaen ni Atalanta ti mansanas! Idi asidegdan iti finish line, umun-una latta ni Atalanta. Maud-udi latta ni lalaki a kimmarit iti dayta a salisal ti lumba! Ngem, nangibato manen ti lalaki ti sabali pay a sinan-balitok a mansanas! Naiyaw-awanen ni Atalanta ti panagkitana. Immunan ti lalaki iti finish line!
Dagiti bambanag ti lubong, pirak, sanikua, dagitoy ti mangiyaw-awan ti panagkitatayo iti dalantayo nga agturong ken Apo Dios. Ta kuna ngarud ni Apo Jesus: “Awan ti adipen a makapagserbi iti dua nga adipen. Ta guraennanto ti maysa ket ayatennatayo ti sabali, wenno agserbinto a sipapasnek iti maysa ket umsiennanto ti sabali. Diyo mapaggigiddan a pagserbian ti Dios ken sanikua.” (Lk. 16 – 13).#
