MAKORIENTE DAGITI LAMES?
Volume XVI NO. 47 (August 10 – 16, 2013)
ITI laksid nga adda existing laws/ordinances a maipawil iti panagkoriente kadagiti lames, adu latta dagiti illegal fisherman. Isuna laeng ta kaaduanna a makalkaluban dagitoy kinukusit nga aramid babaen met laeng kadagiti protector a law enforcers ken kasta met kadagiti public officials (puera de los buenos). No apay a kastoy ti panangipapantayo? Maibatay met laeng iti pammaliiw babaen iti maysa a pagsasao: ADDA, AYA, ASUK NO AWAN TI APUY? Ania ti masaoyo, kakabsat nga agipatpatungpal kadagiti paglintegan?Saan koma a pitik iti pidit-pidityo daytoy a mai-PALSIIT kadakayo, ngem ketdi, padasen/aramidenyo man laeng daytoy a kas pangmurmuray kadakayo. Sapulenyo kadi, a, ti disso a pakaisaysayangkatan dagiti illegal fishing a kas iti panagkoriente kadagiti lames. No ngamin makoriente dagiti lames, babassit ken dadakkel, sangapada a biktimaen ti koriente. Kasla massacre met ti nakaam-ames a pannakadangran/ pannakapapatay dagiti lames. Naim-imbag la koma no sigay ti maipakat a pagkalap ta mapili laeng ti kadadakkel dagiti maalana a lames, batay iti kadadakkel ti abut ti sigay. Daytoy maar-aramid nga illegal a panagkalap, ipasimudaagna ti kinagamrud, kinatulisan nga aramid.Saan nga ibibiang dagiti masalungasing a paglintegan.Kakabsat a violator iti illegal fishing, apay, dakayo la ketdin, aya, ti kayatna ti agbiag ken mairanud kadagiti taraon a masarakan iti uneg ti danum? Saanyo man laeng, aya, a masirmata ti kinapateg ti lames a mapadakkel a nasayaat santo kalaapen iti umno a ppanawen?
Ti makitatayo kadagitoy a mapaspasamak, mapatured dagiti kakabsat nga agkalap iti illegal gapu ta dagiti law enforcerstayo, managpabus-oyda. No saan, gapu ta maimasanda ti aglak-am iti pasuksok a kuarta ken kasta met ti lames a makalapan iti illegal, ay, awan ti agtagtagari lattan, a.
Malagiptayo man daydiay bambanti (scarecrow) a maipan iti pinagayan no umadanin nga agluom dagiti dawa ti pagay. Maaramat daytoy a bambanti (sinan-tao) tapno adda kabuteng dagiti billit-tuleng nga agduom kadagiti agluom a dawa ti pagay. No agangin, agsala ti bambanti. Ngem, ti agbisin a nabiag, kabuteng pay ngata, aya dagiti billit-tuleng ti bambanti? No nagapaston ti pagay, maikkatto metten ti bambanti. Di ngata nasaysayaat a ti pay laeng panagluom dagiti dawa, duomen aminen dagiti billit-tuleng tapno maisakbayen a maigibus ti akem ti bambanti? Ngem, saan, a. Nasaysayaat met laeng no maatipa ti panagduom dagiti billit-tuleng kadagiti dawa tapno addanto met laeng pakairanudan dagiti kakabsat a mannalon.
Kasla bambanti dagiti paglintegan a di met maipatpatungpal kadagiti aglabsing (violator). Kailala ti bambannog dagiti lawmakers a nangpampanday dagita a paglintegan a maipapaigid met gapu iti kasasaad dagitoy a kasla bambanti.
Law enforcers, sapay koma ta positive ti pannangawatyo dagiti pammaliiwtayo. Saan, aya, a gagemtayo amin a matuntonan ti kinapudno? Tapno agsayaat ken maidaydayawtayo amin.
PAGPAMPANUNOTAN: Between truth and the search for truth, I opt for the second. – BERNARD BERENSON.#
