TI adal iti biag ti maysa a tao, kaarig daytoy iti kita ti lupot. No ania ti kaibatogan ti maiyebkas a kapanunotan/rukoden/tukoden ti tao no ania ti adalmo, ti galadmo: natangsit, naparammag, napakumbaba wenno ania man. Usigen ti gimong dagita.Ket, babaen iti risiris dagiti makagapu, iti pannakilangen ti tao kenka, karbenganda nga usigenda no kaduadaka wenno saan. No pakaidayawandaka a kadua wenno saan. Adda ngamin daytay pagsasao iti English a kunana: TELL ME YOUR COMPANION AND I’M TELL YOU WHO YOU ARE… Siempre, no galadmot’ natangsit, mabalin a ‘tay met kapadam iti ad-adda a pakikaduaam wenno ad-adda a makakinnaawatam.
Ti adal/panagadal, kaarigna it panangpatadem iti buneng. A no nasayaat ti pannakatubay ken pannakaasa ti buneng, napimpintas met laeng iti padsuek ti tademna.
Naitalek kadagiti mannursuro ti masakbayan dagiti adalan iti panagadal dagitoy tapno iti pagsukogan iti masakbayan, maipanakkelto dagitoy nga adalan iti ania man a tay-ak iti propesion a pinilida.
Iti kinasaririt, kinagaget, kinasingpet dagiti mannursuro, mabalin nga aganninaw dagita a saguday kadagiti adalanda.
No nasadut a mangisuro ni maestro/maestro: dina maipatpatungpal amin a linaon ti Lesson Plan-na, ania ngaruden ‘ton madanon iti examination dagiti adalanda? Manangadtangadto dagitoy iti bobeda (nasayaat no saan a sumarot ti lawag ti law-ang iti galva).
Nagasat dagiti agad-adal a napasnek nga agadal iti leksionda. Ngem, manmano met dagiti agad-adal iti elementaria ken sekundaria. Adu unay ti makaawis iti imatang dagitoy, ket, isukatda ti orasda nga agbasa iti leksionda.Nasayaat no amin a masumokda a pagaliwaksaytan, ket, maiparbeng a pagliwliwaanda.
Adu dagiti libro nga agur-uray ti pannakaukagna idiay biblioteca ti pagadalan. No ammo nga iyulo ti linaon dagitoy, amang a napatpateg ngem iti sangkatukel ti balitok. Ta ti libro, saan a mailimed ditoy ti kinapudno. Ti libro, kaarigna ti bubon a di pulos maatianan ti ubbogna a pagsakduan ti kinasirib ti maysa a tao. No ad-adu ti libro a basaen, ad-adu met laeng ti masakdu nga adal.
Sasawen ‘toy numo ti biang daytoy ta ammok itan ti kinapateg ti libro. Isu a no adda bassit iggemko a siping, igatangko daytoy iti kayatko a libro. Maragsakan ngarud ‘toy numo ti biang ta ti bassit a bibliotecak, ditoy ti pagsukisokan dagiti kaannakak nga agad-adal iti sekundaria ken elementaria. Dakkel ti maitulong ti sangkabassit a kabaelak nga agsurat.
Ti libro ngamin, daytoy ti gayyem a di pulos manglipot.Dina ammo ti mangallilaw. Matalek pay a pagliwliwaan. Makainanaka la ngaruden, maliwliwa ken makaadalka pay!
Ala, rugiantayon, ti agbasa ti libro. Ta dakayon ti mangtukod ti kinapudno dagiti nanumo nga imbislinko a kapanunotan. Yantangay, di met agpakleb ti kinapudno, saan kadi?
