Wen, di laeng mamin-ano, aya?Panagtatalon manen.Awan sapulen ti kinagaget dagiti mannalontayo nga agtalon.Uray bangkirig, simpaenda.Uray karimeran, dalusanda.Daytoy kastoy a kinagaget ti mangitunda iti nasaysayaat a panagapit iti nawadwad.
Ngem, ti kas-angna, adu latta ti pada a makurkurangan ti kasapulan iti pagbiag.Saan ngamin nga umdas ti apit a pamataudan kadagiti kangrunaan a kasapulan ti tunggal familia.Adu ti maapit.Ngem, ti kas-angna, no adu ti maapit ti sapasap a lugar, nalaka ti presio ti produkto. Kasla ngamin kimpet a tekka ti nagbalinen a tradition iti price manipulation! Daytoy a price manipulation ti mamagsadut kadagiti mannalon tapno ipasnekda koma ti agtalon.Uray koma bantayandan ti puon ti pagayda iti agpatpatnag no napintas ti presio.Ngem, ania? Awan sa met maaramidan dagiti agtuturay daytoy a price manipulation? Nadardaras sa met a pagtignayan dagiti agtuturay no rumbeng a mapastrek ti produkto nga aggapu iti sabali a pagilian gapu iti pannagawatda iti S. O. P. wenno pasuksok? Daytoy a kapanunotan, batay laeng iti saan a kabukbukodan a pammaliiw/damag a kas met ti masansan a mangmangngeg iti tri-media.
Malagipko idiay pagilian a Japan.Nailet ti agricultural land-da idiay.Nangina ti buis ti daga.Tapno di mabuisit dagiti mannalon idiay, agar-aramatda iti nangato ti kalidadna a teknolohia. Nagaget dagiti mannalon idiay a kas met ti kinagaget dagiti mannalontayo ditoy pagilian ni Juan de la Cruz. Ti pagsayaatanna idiay, nangato ti presio ti produkto.Ditoy?Maigidiat. Nangina ti produkto a kasapulan iti panagpatanor dagiti mannalon iti agricultural products-da gapu iti agsusukot a pagbuisan. Ammotayon a ditoy Filipinas, no pagbuisan, kaarigna met ti malallalattayo. Sapay la di makaay-ayo ti presio ti produkto. Di maikkat ti price manipulation iti produkto dagiti mannalon agsipud ta dagiti kasla agdardara nga alimatek (leech) a big time businessman, ipasublatda ti puonanda iti kababassitan a negosiante. Ti kangrunaan a tulagan, ag-commission ni kababassitan a negosiante. Gapu iti kinalaka ti presio, agkunsimision ni kabsat a mannalon! Nangato ti danon ti big time businessman. Ngem, gapu ta suapang met ti kababassitan a negosiante nga annabo dagiti buaya iti takdang, ibabana pay ti paggatangna iti produkto! Maysa pay, ni kababaan a negosiante ti agipautang iti kasapulan ni mannalon, iti nangato latta nga interest (6% ti kababaan). Inton aglako ni mannalon iti produktona, gapu iti delicadeza wenno palabra de honor, uray barat ti presio, ilakona ken ni nakautanganna ti bukodna a produkto. Awan pulos ti competition iti presio dagiti aggatang. No dingnguen koma, nakaponen isu a saanen nga aganak pay. Kasta ti rigatna iti biang ni Apo Mannalon a pada nga agguutang. Mailumlom latta ni pada a mannalon iti utang!
Kasano a mapuglay ti price manipulation tapno agbalin koma met a nasaldet latta dagiti mannalontayo nga agpatanor kadagiti taraon a kasapulantayo? Agtalinaed kadi lattan dagiti mannalontayo nga isuda ti DURI TI PAGILIAN?Apay nga isuda ti DURI TI PAGILIAN? No ngamin iti bagi ti tao, ti duri ti kangrunaan a pagtaudan ti tibker ti maysa a tao. Isu a kasta ti birngas dagiti kakabsat a mannalon. Duri nga agpayso dagiti kakabsat a mannalon. Duririanda (buririanda) ti makasinit a darang ni Apo Init ken kasta met laeng ti tumulang a lam-ek.
PAGPAMPANUNOTAN: The important thing is not stop questioning. – ALBERT EINSTEIN.#
