PULI a matikTIKAW ti kayatko a sawen ti topikotayo ita a lawas, gagayyem ken kakabsat. Umuna, dakamaten ‘toy numo ti biang ti kaipapanan (bukod a version) ti PULI (race) ni Filipino nga addaan ti nakalalaad nga ugali, isu daydiay nalatak a kababalintayo a Filipino – crab mentality! No adda dumur-as bassit ti agpang ti panagbiagna gapu iti napasnek a panagagawa, adu ti masao dagiti adda siding ti dilana. Ala, wen, adu latta ti dumurdur-as ti agpang ti panagbiagna gapu iti umno a wagas ti panangtimonda ti kasasaadda. Iti ababa a pannao, legal ti pagtataudan ti agserbi iti familiada. Mabalin a nasinged ti relasionda ken Apo Dios ken ammoda ti umno a panaggastos. Ken kasta met iti umno a panagsalimetmet.
Adda met dagiti dumurdur-as ti panagbiagna gapu iti tinutulisan nga aramid. Dinudurogas! Kaslada la igges nga arabas nga agkamkam iti saanda a pagbambannogan. Adda dagiti nalaing nga agbirkog. Adda dagiti nalaing a mangkusit iti amoda tapno adda matakawda a kuarta iti sapul ti negosio a pagpapaayanda a kas katulong/katalek kdpy.
Iti PULI ni Pinoy (Filipino), naipaagsepen iti ugali ti sinnikkuat. Nupay ammo ti amin a napateg unay a kababalin ti honesty is the best policy. Iti biang ti agkarkaradukod a boksit, uray napait a taraon, allawaten ti rusok, kunada man! Ket, dayta unay ti paitna a mairamramen iti biagtayo. No mabalin, maaddaantayo iti natalinaay a panunot ken kananakem. Saan a gapu iti narigat a paspasaren iti biag, kaslatayo lattan daytay ruting nga abalbalayen ti dalluyon ti biag. Narigat ti biag-kasasaad ‘tay kunada a matay-mabiag! Aginaldaw a karkarawaen ti tengnged a kunada!
PULITIKAW! Dagiti PULI (tiko) a mangtikTIKAW! Iti gobierno ni P-Noy, ayanna ti pudno nga anag ken kaipapanan ti ibagbagana a ‘tuwid na daan’? Ayanna dagiti naaramidanna a nangkissay ti naraas a ramay dagiti ‘buaya’ ti gobierno a mangkurkurimes ti kinabaknang ti Fiilipinas? Nagadu ti anomalia iti gobierno ni P-Noy! Ania itan ti binanagen ti PDAF anomaly? Ania itayen ti kayat a sawen ti PDAF? Priority Development Assistance Fund? Dugol! Pagbibiagan Dagiti Alimatek iti Filipinas, a, dayta ti PDAF itan! Pagrarangasan dagiti kurakot nga agtuturay dayta a ‘pork barrel’ ti gobierno ni P-Noy!
Ania daytoy ‘budget insertions? No ut-utobentayo, kakabsat, daytoyen ‘tay pundo a maruk-atan a maiparabur iti asino man a kaaliado ti administration. Apay a mapilpili laeng dagiti pannakabagi iti kamara ti maikkan iti dayta a magisaygisay a ‘budget insertions’? Maymaysa laeng ti kayat a sawen dayta – tapno pagkampania dagiti kaaliado ti administration iti masungad a panagpipili! Anian! Ayanna ngaruden ti anag ti masasao nga equal distribution of wealth? Mapung-il sa ketdi ti tengnged ti saan a mapulsot a panagngilangil no kaskasano. Pakpakawan berde!
Banana equals saba latta! Manegdeg a kasla letteg! Awan ti natibker a pammati nga adda namnama iti panagdur-as. Adu unayen dagiti kaarigna berdugo nga agtuturaytayo. No berdugo a kunatayo, dagita ti criminal nga agsepsep iti daratayo agingga a matmataytayon iti rigrigat, kakabsat! Berdugo, kunatayo, agsipud ta ti buis ni Juan de la Cruz, maaw-awagan met iti ‘dara’. Ibusenda aminen a ‘dara’ ni Juan de la Cruz! Alimatek (leech) pay ti maysa a termino kadagiti kurakot nga agtuturaytayo. Di ngamin, kakabsat? Daydiay alimatek, agsepsep met ti dara ti tao?
Agalibtak ken agbalintayo koma a masirib, a, tapno di agtultuloy a maul-ulawtayo lattan gapu kadagiti manglimlimo nga agtuturaytayo.#
