Saan nga agtudo amin a disso. Pagsasao daytoy dagiti nataengan.Ania ti kayat a sawen daytoy iti literal?Iti kasasaad ti panagbiag, saan nga agpapada. Adda dagiti babaknang; adda met dagiti marigrigat.
Nupay kasano ti kinarigat ti panagbiag, di kayat lattan ti dadduma ti maawagan ti marigrigat.Apay?Ngamin, adda kas-angna ti kasta a kasasaad. No nanumoka unay, ilupitlupitdaka dagiti tao. Kaarigmo ti ruot a mabaddebaddekan ti wayawaya ken kalinteganna.
Nupay kasano ti kinarigat ti panagbiag, naibudi ti panagsalukag iti tarigagay a dumur-as ti panagbiagna.
Mapasangasangan ti isasangbay ti kalgaw ditoy Kailokuan. Kaaduanna a kakabsat a mannalon no kua ti agnail-il agsipud ta agkurang metten ti pagpasayakda kadagiti mulada. Aglaylay dagiti mulada. Malanetda agingga nga agtamed ken patay. No saan, nakuriteg iti panagdakkelda. Saanto a nasalun-at ti maibunga dagitoy. Agtinnagto metten ti di mapulsot a sennaay dagiti kakabsat a mannalon.
Dimi maawatan ti turay ngamin no dadduma.Ibagbagada a ti agrikultura, isu ti maipangruna a mataming iti kasapulan ditoy.Tapno saan nga agkamtud, ngem, ketdi, adda umdas a taraon ti pagilian. Ngem, kasla mising in action sa ketdi ti mapasapasamak. Kasla iti agdama, nangina latta ti abono. Ti crude oil, ala, adu metten a serye ti rollback-na. Ngem, di latta mapukaw iti panagduadua dagiti mannalon.Amangan no pagammuan tumayok manen a kasla ullaw ti presio ti crude oil.
Mangliwengliweng a kapanagan ti nalawa a makita ita. Kasla umasa-asuk a disierto ti kapanagan a sigud a nalawa a pagtatalonan.Kuna dagiti mannalon a nakail-ilala dagita a daga.Pinggan a nadadael ti kaarigna.Saanen a pagnumaran iti maapit a taraon.Nakisang la ngaruden ti naapit, nalaka pay ti presio ti irik. Kastoy ti agparparang a makaigapu: ni mannalon, manipud iti bin-i, abono, crude oil, inutangna kadagiti negosiante. Idi panagaapiten, agsingir metten ni negosiante kadagiti mannalon a pinautanganna. Irik ti pagbayad ni mannalon. Uray nalaka ti presio ti irik, iteden ni kabsat a mannalon. Ta mabain met ni kabsat a nakautang a di ti nakautanganna ti pangitedanna ti irikna. Ita, awan met ti sukrot a mapalubosan a sumbrek nga aggatang. Adda ditoy ti price manipulation.
Agparparang a maik-ikkan iti kaipapanan ti pagsasao nga URAY MALUGI BASTA SUKI. Ania pay ngarud ti maaramidan itan? Kayat met ti makabayad iti inutang.
Nasawang ti tambak ti karayan. Nadadael pay ti dadduma nga irrigation facilities. Awan ngarud ti namnamaen a pagpadanum dagiti kakabsat a mannalon.Bay-amon ti agtalon, kuna payen ti dadduma.
Kas mapaliiw, bassit laengen ti nagraep iti second crop.Nasaysayaaten a kawaw dagiti kinelleng ngem iti maraepan, mamulaan, kalpasanna, agrengngat laeng ti daga.Narigat ti malugi nga agtalon. Narigat ti masansan a masingsingir no di dagus a makapagbayad iti utang.
