Kadaanan a balakad dagiti nataengan: agin-inayadka a magna no inka agpukan ti kawayan. Apay?Narigat ti masiitan.Aglalo no iti rusaok ti dapan ti kumapetanna.Natadem/natarid ti siit ti kawayan.Agdara ti masudak.Aglinebbeg ti sugat. Naut-ot…
Pagsasao dagiti nataengan: AGIN-INAYADKA A MAGNA. Ta adda dagiti managdardaras, gapu iti dayta, isu met gayam ti pakaibayaganda a dumanon iti papananda.
Kasano?Kas pangarigan ta agdardaraska iti papanam, gapu iti panagkamakammo ti oras, nalipatam gayam ti kaskenan a kasapulam. Inka agilubbot ti suratmo ti kunam, sabali met ti naitugotmo. Listaan met dagiti gatangem, idiay tiendaan!Agsublika.Nakaadayoka gayamen.Pagammuan, napanawankan ti lugan, maladawkan, a.
Kunada ti kinamanagdardaras no dadduma, isu ti pangrugian iti panagbalin a kinamanaglilipat.Tapno maliklikan, masapul a ti tunggal naka-schedule a papanam, nakasuratda amin. No saan, ti kangrunaan nga itugotmo a kasapulam iti papanam, naruar tapno isu no kua ti umuna a masagud ti panagkitam no rummuarkan iti pagtaengam.
Kinamanaglilipat sa pay ketdi ti kangrunaan a makaigapu iti pannakalipat no dadduma kadagiti nasasayaat a kababalin ti tao. Adda ngamin dagiti sigud a managdayaw, ngem, ita ta nataengandan, nagbalinda metten a nasabrak.
Puera de los buenos, kakabsat.
Kasta laeng ti biag. Nadumaduma ti galad: pakaidayawan wenno pakaibabainan. Pakailuodan wenno pakailunodan.
Ngem, nupay liklikan a mabaddekan ti siit ti kawayan gapu ta makadangran, no dadduma, masapul met ti siit a pangsualit ti paset ti bagi a naglinebbeg. Kangrunaanna no iti ramay ti ima/saka, takiag/gurong ti ayan ti linebbeg.Natalged ti siit ti kawayan a pangsualit ti linebbeg.Kalpasanna, patubbogan iti tubbog ti busbusilat (kuribetbet, kuna ti dadduma).
Siit ti lames (ikan, paltat, gourami, kdpy.) Narigat ti maikdalan.Agbaribar iti karabukob ti siitna.Urayka la a makalua no kua.Di maimasen ti mangan gapu iti siit nga ikdal.
Malagipko ti duogan a pammati dagiti nataengan: no naikdalanka, iparabawda ti rigis (nisnis/pagpunas a lupot) tapno dardaras kano a maikkat ti ikdal a siit. Agpayso ngata?Pammati la nga agpayso, aya?
Ania pay ita ti siit a pakaikdalan? Iti waig, karayan, aripit, pagtatalonan, awan metten makalapan?
Nasabidongan metten ti bagi ti danum. Nakalap, naibus metten dagiti lames. Agraira met latta nga awan ti sardayna ti illegal fishing. Uray adda dita ti linteg ti pagilian a masalsalungasing.
