NATAN-OK a gagem ti namagbalin iti maysa a tao a kas mannursuro.Ti kinamannursuro ti maibilang a katatan-okan a profession. No maminsan, saan nga awagan iti profession, ngem, ketdi, awagan iti vocation. Saan nga umdas dagiti balikas a mangiladawan iti saan a magatgatadan a sakripisio ni mannursuro a mangiyallatiw ti di magatgatadan a tinukel ti adal nga agpaay kadagiti adalan. Nadagsen nga akem ti mannursuro ti naipabaklay iti abagana a pagrebbengan. Ngem, saan a dagita ti lappedna tapno ituloyna nga ipatungpal a sipupuso, sipipinget ken sireregta iti pagrebbenganna kadagiti adalan uray nalablabes pay ngem iti ninamnama nga ipatungpalna a pagsayaatan.
Babaen iti a pannangisuro ni mannursuro kadagiti umno nga aramid ken adal a nasken nga umagsep iti panunot dagiti adalan (student/pupil), aramaten ni mannursuro iti umno a balikas a mangiladawan/mangipaawat kadagiti wagas/panglakagan nga aramiden dagiti adalan.
Ti aglawlaw ken lenguahe, dagitoy ti agkaasmang/agdanggay a banag nga impaay ti Namarsua.
Ti nakaparsuaan (rumiet a kabakiran), a pakasapulan kadagiti taraon, nabiag nga ubbog, dagitoy ti mangipapaay ti kasapulan ti tao iti aginaldaw. Ilawlawag ni mannursuro kadagiti adalanna no aniada ti akem ti nakaparsuaan iti masakbayan a biag ti taonken amin a nabiag no saluadan ti aglawlaw. Iladawan pay ni mannursuro ti makapaaliaw a ladawan ti aglawlaw no baybay-an a madadael wenno iranta a dadaelen pay ketdi ti tao iti nadumaduma a makaigapu a mabalin a pakairanudanda, ngem, iti laeng agdama; saanen iti masakbayan.
Ti lenguahe, gamigam ni mannursuro a maiyallatiw kadagiti adalan. Ilawlawag ni mannursuro no apay a nasken nga ipateg/saluadan ti aglawlaw. Isuro ni mannursuro kadagiti adalan no ania ti masasao a balanse a relasionda iti aglawlaw (give and take relationship). Kas koma dagiti mabasbasa kadagiti bulletin board a kunana: PROTECT OUR TREES TODAY FOR TOMORROW THEY WILL PROTECT YOU (US). Ilawlawag ni mannursuro babaen iti mainugot a pannangiladawan no apay a saluadan dagiti kayo iti agdama. Kas maawatan iti ngato, dagiti kayo ti mangsaluad kadagiti umili wenno amin a nabiag iti kanito a sumangbay ti didigra. Nalaka nga ilawlawag ni mannursuro no ania dagiti mabalin nga ibungana no agtultuloy a dangran dagiti tao dagiti muyong iti aglawlaw. Kas koma dagiti mapaspasamak no sumangbay dagiti bagyo ken kasta met ti tikag. Iyadal/ilawlawag ni mannursuro kadagiti adalanna ti agpada a kinapateg ti naruay a muyong iti aglawlaw iti man panawen ti panagtutudo wenno iti tikag. Makapaaliaw ti mapaspasamak ken mapaspasaranen ti dakes nga apektona ti masasao a climate change.Adda laeng sumangbay a napipigsa a tudo, nakaal-alisto a malayus dagiti nababan a lugar agsipud ta nawadan dagiti kabakiran.Bassiten dagiti muyong iti aglawlaw a manglapped ti adu a danum a napardas nga agkaruskos kadagiti nababa a disso. Isuro nimannursuro no ania ti umno nga aramiden dagiti adalan wenno dagiti lumugar tapno malappedan iti panagreggaay ti daga.
Heal our land, don’t delay, plant a tree today. Ilawlawag ni mannursuro iti nalaka a maawatan babaen iti lenguahe ti umno nga aramiden dagiti adalan tapno makatulongda met iti pannakasaluad ti aglawlaw.
Exampleisleadership. Daytoy a sinao ni Dr. Albert Schweitzer ti bagnos ni mannursuro tapno ipakitana babaen iti aramid no kasano nga imula ti kayo ken saluadan dagitoy a mula tapno tumanor nga agpaayto a pagsalinongan iti masakbayan.
Ti adal nga ipaagsep ni mannursuro kadagiti adalanna, ket, dagitoy ti maregmeg ti balitok a saan a magatadan no saluadan, ipateg, tawiden ken aramaten a pagsayaatan ti sapasap.
Ni mannursuro, asideg kenkuana ti panagballigina a mangiyallatiw iti nasayaat nga aw-awid ken aramid ken adalan no la ketdi ipapusoda dagitoy nga aramiden/ipatungpal ti naadalda.
Saan a matukod ti aglaplapusanan a ragsak iti lansad ti barukong ni mannursuro inton maimatangannan ti narnuoyan a nagballigi nga adalanna a dimngeg ken nangaramid kadagiti inyad-adalna idi kadakuada.
Kunanto met dagiti adalan ken ni mannursurona idi: “Gapu iti saan a magatgatadan iti kinapategna ti adal nga impaagsepyo kadakami idi, ma’am, sir, adtoy, addakami met ita iti yuyeng ti balligi. Ngem, dayta a balligi, nangrugi kadakayo…”
Sumpilot no kua ti tarumpingay iti puso ni mannursuro. Tarumpingay iti biang ti ragsak gapu ta ti naruay a sakripisio ni mararaem a mannursuro, nagbunga, nagballigi bayat nga impatpatungpalna ti katatan-okan nga akemna iti gimong a nangtubay kadagiti nagtulnog nga adalan a nagtawid iti di magatgatadan a pannursuro ni natan-ok a mannursuro…#
