Trabaho, kunatayo man no ti panangikalikagum a panangidaulo, pannakipaset tapno agtalinaed a nabiag ti nakaisigudan a pakaseknan iti panangisakit ti nakaparsuaan, isu la nga isu. Vocation?Wen, no vocation man ti pangbilangantayo dagiti ar-aramidentayo nga addang a panangisakit ti nakaparsuaan, nasayaat la unay, kakabsat.
Tunggal maysa kadatayo, addaan iti bukod a vocation a nasken nga aramiden, ipatungpal a situtudio ken sitatan-ok, kakabsat. Wen, kas maysa nga ina wenno ama a mangsappuyot ken mangtarawidwid iti bukod, inawat a vocation. Maysaka man a negosiante, politico, wenno kadawyan a makipagili. Addaantayo amin iti nakaawagan. Ngem, maymaysa koma ti pagtalimudokan ti amin dagitoy: ti pannakipagpasettayo iti pannakaipasdek ti Pagarian ni Apo Dios. Maymaysa met ti turong ken pagulidanan a mangipakat kadagiti vocation wenno pagannongan ti tunggal maysa kadatayo. Iti Naimbag a Pastor, ni Apo Jesus, nagserbi a kupikopna ti kinapakumbaba ken saan a managimbubukod.
Daytoy ti makita ‘toy numo ti biang a kaaduanna a pagkamtudan.Nakurang ti kinapakumbaba.Nangato a pride ti agtalinaed a kababalin.Agar-ari ti kinaadda ti bukod nga interest (self-interest). Agtultuloy a nasaknap ti graft and corruption! Bambanti dagiti paglintegan.Ti kayatko a sawen ditoy, saan a maiyaleng-aleng dagiti paglintegan. Kas pammaneknek, agtultuloy latta ti panagraira ti illegal a sugal, isu daytoy ti nalatak a jueteng! Nakapuy ti pannakaipatungpal ti paglintegan a mangprotehar ti masasao a Solid Waste Management Act, Clean Air Act, kdpy.
No maikkat ti kinamanagimbubukod, maitandudo ti pagimbagan ti sapasap ti ad-adda a maipangpangruna, maikkat amin a mangtengtengngel/manglaplapped ti panagdur-as ti pagiliantayo. Kangrunaanna, maikkat dagiti mangigawgawid ti pannakaisaknap ti Pagarian ti Dios.
Ipapusotayo koma, kakabsat, ti makipagpaset iti tinawen a World Day of Prayer for Vocations.Kas ti kadawyan, iyaw-awis dagiti Appo nga Obispotayo iti Filipinas, ti agtultuloy a panangikarkararag iti vocation iti daytoy nga aldaw.
Malagip nga idi Abril 11, 1963 ti kaunaan a naiyalnag/nairusat ti World Day of Prayer for Vocations, babaen kadaydi Papa Pablo VI.
PAGPAMPANUNOTAN: Let prayer be the key of the morning and the bolt of the evening. – MATTHEW HENRY.
